2021
LUR AZPIKO FORMAKUNTZA
Autogestionatutako proiektuetara egokitutako formakuntza bat
Bitamine Faktorian bertatik bertara ezagutzen ditugu gaur egungo kultura esparruko testuinguru eta agertoki desberdinak; izan ere, egunero egiten diegu aurre proiektu independente bat kudeatzeak dakartzan oztopo eta zailtasunei, kultura bezalako sektore prekarizatu batean. Aspaldidanik, sektoreko hainbat eragilek eta profesionalek jarduera mota horren know how-a ezagutzeko interesa dutela ikusi dugu. Beraz, horrelako prestakuntza eskaintzea aukera bat da ezagutzak partekatu, antzeko kezkak dituzten pertsonen arteko harremanak sortu eta ekosistema bera indartzen laguntzeko.
HELBURUAK
Alde batetik, ohiko formakuntzei prestakuntza osagarria eskaintzea, enpresa kulturalaren ohiko ereduan sartzen ez diren proiektu autogestionatuetara bideratuta, hau da, beste errealitate, erronka eta zailtasun batzuei aurre egin behar dieten egitasmoetara.
Bestetik, kudeaketa-, komunikazio- eta diseinu-tresnak eskaintzea, proiektuak aberasteko eta beste kultura- eta arte-egitura batzuen hazkunde-aukerak areagotzeko, bai eta kultura- eta sormen-arloan interesa duten pertsonen prestakuntza bultzatzeko ere.
Programa osoak hiru atal osagarri ditu:
//// KULTURA-KUDEAKETA
Bitamine Faktoria proiektu independentea da, eta, halabeharrez, hazten eta kultura-errealitate eta politika desberdinetara egokitzen joan da. Atal honek gai hauek biltzen ditu: proiektu independenteen sorrera eta kudeaketa, jarduera mota horri egokitutako finantzaketa- eta administrazio-moduak, ereduak, profilak eta estrategiak, ebaluazioa, lankidetza eta sareak.
//// DISEINUA ETA IRUDIA PROIEKTU KULTURALETAN
Laburrean, diseinu-tresnak proiektu kultural eta artistikoetan, hau da, marka, branding-a eta ikus-identitatea. Gure proiektuei ematen diegun diseinuak eta irudiak gainerakoetatik bereizten eta kokatzen dituzte. Atal honetan diseinuaren oinarriak lantzen dira, koloreak eta tipografiak modu arrazoituan konbinatuz, proiektuak edo zerbitzuak sustatzeko irudi eta konposizio erakargarriak sortze aldera; bai euskarri inprimatuetan (esku-orriak, txartelak, kartelak), bai bitarteko digitaletan (webgunea, bloga, mailinga, sare sozialak).
//// KOMUNIKAZIO KULTURALA
Kultura-erakundeetan komunikazioa tresna estrategikoa da. Atal honetan, kultura- eta arte-arloetako komunikazioaren berezitasunak lantzen dira, kultura-edukiak ahalik eta ondoen komunikatzeko jardunbide egokiak aztertzen dira; bai eta kultura-produktuak eta -zerbitzuak merkaturatzeko tresnak eta estrategiak, komunikazio-plan baten diseinua eta komunikabideekiko harremana ere.
DATAK
2021eko martxoaren 15etik 18ra
15:00etatik 19:00etara
Partaide-kopurua: 10 lagun
NON
Tabakalera | Kultura Garaikidearen Nazioarteko Zentroa
Andre zigarrogileen plaza, 1
20012 Donostia
HIZKUNTZA
Gaztelania
IZEN-EMATEADoakoa, lekuak bete arte
Lekuak agortuta. Itxaron-zerrenda zabalik
Izena emateko orria
EPEMUGA
Martxoaren 12 arte
+INFO
faktoria@bitamine.net | jaitsi informazioa
KOMUNITATEAREN PARTE-HARTZAILEAK
PROIEKTU GEHIAGO
Auditoria Soziala
Gure erakundeak gainditu egin du Auditoria Sozialaren ebaluazioa!
Hemen ikus dezakezue 2024ko nuetra infografia:
Urumeako Atlas Emozionala:
www.atlasurumea.eus
Urumeako Atlas Emozionala proiektu bat baino askoz gehiago da: Donostiako herritar guztiei irekitako gonbidapena da, Urumea ibaiarekin dugun harremana ehundu duten historian, emozioetan eta bizipen partekatuetan murgiltzeko. Biztanleen lankidetza aktiboaren bidez, proiektu honek ibaiaren inguruko memoriak eta sentimenduak jaso eta islatu nahi ditu, hiriaren garapenaren eta bilakaeraren lekuko mutu baina funtsezkoa izan baita.
Cristina Enea Fundazioak bultzatuta eta Donostia Kultura, Tabakalera eta Aranzadi Zientzia Elkartearen babesarekin, Urumeako Atlas Emozionalaren helburua herritarren parte-hartzean oinarritutako lan kultural eta artistikoa sortzea da. Atlas hau ez da datu edo istorioen bilketa soil bat, baizik eta sormen prozesu bat non bizipen pertsonalak gure hiriaren nortasuna ibaiarekin duen harremanaren bidez erretratatzen duen lan baten ardatz nagusi bihurtuko diren.
Erretratu kolektibo hau eraikitzeko, zure parte-hartzea behar dugu. Online inkesta baten eta taldeko elkarrizketen bidez, Urumearekin lotzen zaituzten oroitzapenak, pasadizoak, bizipenak eta sentimenduak bilduko ditugu. Testigantza bakoitza baliotsua eta bakarra da, eta Donostiaren aniztasuna eta aberastasun emozionala islatzen dituen obra bat sortzen lagunduko du. Herritarren parte-hartzea da proiektuaren bihotza, eta hori gabe ezingo genioke atlas emozional horri bizia eman.
Online inkesta zure oroitzapenak eta sentsazioak ibaiaren inguruan erraz partekatzeko diseinatuta dago, eta zure ekarpena funtsezkoa izango da mapa emozional hau eraikitzeko. Zure ahotsa, oroitzapenak eta istorioak entzun nahi ditugu, denboran iraungo duen ondare kultural eta artistikoa elkarrekin sortu ahal izateko.
Esperientzia horiek bildu ahala, atlasa osatuko duten gai nagusiak zehaztuko ditugu. Ondoren, emaitza horiek dibulgaziozko argitalpen batean eta Urumearen izaera eta historia emozionala islatzen duen erakusketa batean islatuko dira. Horrela, proiektu hau esperientzia ukigarri eta ulergarri bihurtuko da komunitate osoarentzat.
Urumeako Atlas Emozionala aukera paregabea da gure ingurune naturalarekin konektatzeko eta ibaiak gure eguneroko bizitzan eta Donostiako historian duen garrantzia gogoratzeko. Elkarrekin, oroimen kolektibo hori berreskuratu eta gorde dezakegu, eta, aldi berean, gure hiriak Urumearekin, iragana, oraina eta etorkizuna lotzen dituen ibaiarekin, duen lotura biziberritzen lagundu.
Ez itxaron gehiago: bete online inkesta eta parte hartu Urumearen oroimenean zeharreko bidaia zirraragarri honen eraikuntzan. Zure istorioa gurearen zati bat da. Lagun iezaguzu emozioen mosaiko hau ehuntzen eta Donostiaren arima eta ibaia islatuko dituen obra bati bizia ematen.
Egitasmo hau Cristina Enea Fundazioak eta Donostiako Udalak sustatzen dute, María José Noain Maura (LOs Viajes de Aspasia) eta Helga Massetani Piemonte (Bitamine) koordinatzaileen laguntzarkin.
DENDA ONLINE
Bitamineren argitalpen eta proiektu guztiak aurki ditzakezu gure online denda berrian:
shop.bitamine.net